قلبي يا طير

تقريباً كده بقالي 10 دقايق بفكر ابدأ الكلام ازاي.. ولما زهقت قلت هبتدي اكتب.. والكلام اكيد هيجي لوحده
دلوقتتي الساعة حوالي 3:30 صباحاً، يوم الجمعة.. صحيت حوالي 7 مساءاً وبكرة السبت إن شاء الله هيبتدي شغلي- بعد أجازة عيد طويلة الحمد لله كنت محتاجاها جداً- لذا قررت أطبّق وأوصل الجمعة بالسبت بدون أي نوم.. وأروح لهم بكرة الشغل أول يوم بعد الأجازة مهيسة
مودي دلوقتي عصبي جداً معرفش ليه تحديداً.. بس يمكن لأني بدور على لحظة هدوء محتاجاها.. والبيت كله صاحي حواليا، وقاعدين فوق دماغي حتى هذه الساعة المتأخر من الليل.. والأدهى ان ماما مش عاجبها طقطقة الكيبورد، وقبلها اشتكت من - قال ايه - ازعاج صوت الأغنية اللي بسمعها في الهيد فون وانا عاملة الفولم على 33-100.. أي والله
!ماعلينا
المهم يعني.. انا كنت عايزة اكتب التدوينة دي علشان اقول أجازة التدوين الإجباريةاللي كنت اخدتها طول شهر رمضان خلصت أهي الحمد لله.. وماكنتش متخيلة إن ليا أهمية عند حد في العالم التدويني.. مع ان كتير منهم كانوا بييجوا على بالي والله وكان بيبقى نفسي اخش اقرا اخبارهم وتدويناتهم، بس للأسف ماقدرتش لضيق الوقت
كنت داخلة على رمضان بشخصية ربما قد تكون قوية والأكيد انها عصبية و مستفزة في تناقضها أو ربما غموضها.. وخرجت منه أكثر هدوءاً ويمكن أقل ثقة في نفسي
وكان رمضان لطيف جداً وجميل لو استثنينا الوعكة النفسية اللي جتني في أواخره
أي نعم ضاع معظم وقته في الشغل والسعي لبلوغ طموح لامتناهي.. بس مع ذلك استمعت فيه بوقتي جداً واتعلمت واكتشفت حاجات جديدة فيا وفي اللي حواليا وفي الكون بأسره
حتى الشغل نفسه كنت مستمتعة وانا بقوم بيه.. حبيت فيا إخلاصي للعمل لما كان الزملاء كلهم بيمشوا في ميعاد الإنصراف.. وانا افطر لوحدي وافضل مع نفسي اشتغل حتى ساعات متأخرة من الليل.. وكنت يادوبك ارجع أعدي على صديقتي الأعز لو الوقت يسمح، أو على بيتنا فوراً..وفي البيت كان بيبقى لازم اقعد معاهم شوية لحد السحوركده-حقهم عليا يعني- والا ماما كانت تقوللي -جملة بتضايقني جداً- ابقي خلينا نشوفك ياهانم، بتوحشينا، وكان بيبقى عندها حق.. المهم بعدهاكنت بترمي قتيلة على السرير علشان استقبل يوم تاني بنفس الشكل
وكنت كل ماجي أنام افتكر أحداث ومشاعر وأقول لازم أدونها لو لاقيت وقت بكرة ان شاء الله، وافتكر أصدقاء التدوين واقول لازم اطمن على أخبارهم لو لاقيت وقت بكرة إن شاء الله.. وطبعاً ماكنش بيحصل
كان نفسي اكتب كتير عن حبي لصحابي رينا ونان وعن ماسورة ذكرياتناالحلوة ، واللي كانت بتنفجر يومياً تقريباًكل ماجي أنام، كان نفسي اكتب عن الناس الذوق اللطيفة جداً اللي تخاف لأسباب مجهولة انك تحبها، وعن طريقي اللي كنت بدور عليه، وعن ربنا اللي دايماً يطبطب عليا ومايضعش تعبي .. وغيره وغيره
والحق اقول إنّ كان في أيام بزوغ من الشغل بدري وارجع على صديقتي الأعز نفطر سوا، وكتير من الأيام اللي كنت بروح فيها بيتنا بدري، كنا نتفق نصلي التروايح سوا, واطلع انسى نفسي أنا والهانم وننسى الإتفاق.. إلا في مرة واحدة ربنا رضي عننا ونزلنا صلينا سوا
كانت أيام حلوة والله.. بس جيت على آخر كام يوم كده ماعرفش ايه اللي حصل لي.. اكتئاب وشبه زلزال لأرضيتي النفسية ، بيحصل لي الكلام ده من حين لآخر.. بس الحمد لله ماطولش، يمكن علشان إسبوع أجازة العيد اللي خدته.. واللي كان فرصة إني ارتاح فيه جسدياً ونفسياً.. طبعاً ناهيك عن وقفة صديقتي الأعز جنبي
والحمد لله أنا الوقتي أحسن بكتير.. وحتى العصبية اللي كنت بدأت اكتب بيها التدوينة قلت،رغم انهم لسه صاحيين
حاجة أخيرة عايزة اقولها..بجد التدوين والمدونين وحشووووووني جداً.. وعايزة اشكر الجميلة الغالية اجنداحمرا على سؤالها الدائم عليّ..ماتعرفش قد ايه أنا كنت سعيدة ومبسوطة قوي لما عرفت بيه
:) :) :)
و دمتم في أحسن حال